NUPELA NAURU PRESIDEN BAI TOKAUT LONG NUPELA KEBINET

MELBOURNE, Australia (Radio Australia, May 29) - Ol i ting olsem nupela Presiden bilong Nauru,Ludwig Scotty, bai tokaut long kebinet bilong em insait long ol dispela dei ikam.

Aste, ol palamen memba insait long Nauru ibin elektim wanpela Spika na Presiden, na pinisim wanpela heve bilong politik em bin go het inap long tripela wik.

Ludwig Scotty,husat ibin wok olsem wanpela sinia Kebinet Minista insait long ol gavman bipo, ibin kisim dispela wok bilong Presiden wantaim sapot bilong ol memba bilong Nauru First Pati, na winim wanpela olpela Presiden,Kinza Clodumar.

Nauru First Pati, em i sanap resis long eleksin nambawan taim long dispela yar, ibin kisim tupela bikpela wok.

Ol ibin elektim Fabian Ribauw olsem Spika aste na Kieren Keke i stap yet olsem Deputi Spika.

Tasol, "numbers game" i go het yet wantaim ol gris-toktok bilong kisim ol kebinet wok na bikpela Finans "portfolio".

Ino longtaim igo pinis, Nauru ibin rausim ol "offshore banking" na "passport schemes" bilong en, tasol em igat bikpela heve yet long moni na i "depend" tumas long halivim ikam long Australia, i tru em ibin kisim traipela moni tru long "phosphate mining" bipo.

May 30, 2003

Radio Australia: www.abc.net.au/ra 

Rate this article: 
No votes yet

Add new comment