BALI SASPEK TOK POLIS BIN BAGARAPIM EM

MELBOURNE, Australia (Radio Australia, June 19) - Wanpela bikpela saspekt long Bali boming i tok, polis bilong Indonesia ibin tok-lukaut long "torture" oa bagarapim bodi bilong em, long traim long mekim em tok olsem Muslim lotu lida Abu Bakar Bashir ibin brukim loa.

Dispela saspekt,Amrozi, ibin wok long givim evidens long kot-keis bilong Bahir, em ol i sutim tok long em long lidim militent grup olu kolim Jemaah Islamiyah.

Ol sapota bilong Bashir ibin singaut na tok "Allahu Akbar" taim Amrozi ibin go kamap long kot bihain long ol ibin flaiim em long balus long Bali igo long kot wantaim planti gad.

Ol prosekuta i wok long traim long pruvim olsem Bashir, krismas bilong em 64 yar, em i lida bilong Jemaah Islamiyah na em ibin traim long rausim gavman bilong Indonesia wantaim wanpela teroris kempein, na dispela sas inap long putim em long kalabus inap long 20 yar.

I tru ol no nap pruvim olsem Bashir ibin halivim long ol Bali boming em bin kilim 202 pipol long mun Oktoba long yar igo pinis, tasol polis i tok, ol dispela bomingi wanpela "operation" oa wok bilong Jemaah Islamiyah.

Amrozi,huisat i stap long "trial" long Bali, ibin tok, i tru olsem em ibin stap insait long dispela plen bilong bomim ol "dens of vice" oa ples bilong pamuk.

Amrosi ibin tokim kot long Jakarta olsem em ibin givim giaman toktok long polis, we insait long en, em ibin tok, em ibin harim wanpela "sermon" oa lotu-tokto ikam long Bashir long "faith and the essence of religion", taim em ibin stap long Malaysia namel long 1996 na 1998.

Taim ol ibin askim em, bilong wanem na em ibin wokim dispela giaman toktok, Amrozi i tok, em ibin lukim ol i "torture" long bikpela brata bilong em, Mukhlas.

Em i tok, ol polis ibin tok-lukaut long em olsem em bai kisim taim-nogut sapos em ino kolim nem bilong Abu Bakar Bashir.

Kot keis bilong em i wok long go het yet

June 20, 2003

Radio Australia: www.abc.net.au/ra 

 

Rate this article: 
No votes yet

Add new comment