PNG BAI GIVIM 60 MAN LONG SOLOMONS 'INTERVENTION FORCE'

MELBOURNE, Australia (Radio Australia, June 30) - Papua New Guinea ating bai givim samting olsem 60 man long joinim lain bai oli kolim 'intervention force' em Australia bai go pas long en, bilong go halvim Solomon Islands long bringim bek lo na oda.

Niusman Shane McLeod i ripot olsem, long wanpela spesal miting tede long apinun, P-N-G kebinet i bin wok long skelim tingting long wanem kain halvim em bai givim.

Oli lukim halvim i kam long ol kantri olsem P-N-G olsem bikpela samting bilong halvim wok long Solomon Islands i kamap gut.

Oli save olsem, ating P-N-G bai givim samting olsem 30 polisman, na namba bilong ol soldia insait long wanpela infantry platoon bai wankain.

Taim kebinet long Port Moresby i wok long skelim tingting long kain halvim em bai givim tede, toksave long dispela halvim bai kam aut tru long Mande insait long wanpela miting bilong ol Pacific Foran Minista long Sydney.

PNG i tok em i sapotim 'intervention' - o wok bilong ol lain arasait i go insait long Solomons long wanem ol heve long lo na oda long kantri i nogut olgeta.

Tasol ol ol bikman i tok, oli no usim kain 'intervention' olsem bilong stretim ol narapela trabal insait long rijen.

Oli ting Australia bai givim moni long ol kantri olsem P-N-G blong halvim ol i joinim dispela fos.

June 30, 2003

Radio Australia: www.abc.net.au/ra 

Rate this article: 
No votes yet

Add new comment